Dodaqların paxlavadır,
Yanaqların şəkərbura.
Gəlib papaq atsam sizə,
Yığ içinə göndər bura.
Gəl bu gün oda, havaya,
Suya, torpağa and içək.
Həsrəti tonqal qalayıb,
Atılıb üstündən keçək.
Torpaqdan yoğrulub sevən ürəyim,
Ondan torpaq qədər məhəbbət istə.
Qanımla suvarıb öz torpağımı,
Vətən göyərtmişəm torpağım üstə.
Sənə də sevgimi açammazdım heç,
Bu sevda başımda dolanmasaydı.
Bəlkə də sevməyi bacarmazdım heç,
Anam bu torpaqdan yaranmsaydı.
Səndən ayrılığa gedən yolum yox,
Səndən gedən yolum sənə qayıdır.
Sənə olan sevgim nədir-bilmirəm;
Haraya atıram-mənə qayıdır.
Saçından ayrılan yola çıxıram,
Gözünə dönməyə yolum tələsir.
Yolumdan çəkirəm məhəbbətimi,
Sənin məhəbbətin yolumu kəsir.
Sevginin sonuncu zəngi çalınır,
Daha həsrətinə qoşulub gedim.
Bir də yer üzündə tapılmayım heç,
Dünyanın əlindən quş olub gedim.
Yığıb-ilk görüşdən bu günə kimi,
Günləri xatirə sapına düzüm.
Sənə ilk görüşdə verdiyim gülü,
Toyunda gətirib qapına düzüm.
Yoxluğuna alışdığım sevgilim,
İlərdir ki,yoxluğundan keçirəm.
Varlığımı yığışdırıb bu gündən,
Mən də sənin yoxluğuna köçürəm…
Yox, qoy su içməsin məndən gözlərin,
Axı ürəyinə axa bilmərəm.
Saçının bir dənə telinə belə,
Gözümün ucuyla baxa bilmərəm.
Sevgim də ölübdür ümidlərim tək,
Guman yox bir daha dirilə bilə.
Mənim məhəbbətim deyil gül, çiçək,
Hər bahar açıla, dərilə bilə.
Bu şirin sevdanın xəyallarına,
Anbaan dalsam da, bəs edən deyil.
Gündə beş yüz kərə profilindən,
Yolumu salsam da,bəs edən deyil.
Sarışın saçlıdır bu göy mələyi,
Yanağı,dodağı arı pətəyi.
Təkcə ondan başqa bütün istəyi,
Daşlara çalsam da,bəs edən deyil.
Yalan məni öldürmədi neyləyim,
Belə getsə öldürəcək düz məni.
Göz yaşınam, gizlənmişəm gözündə,
Görməy üçün yanağına düz məni.
Çox ağlama mənim üçün sağam mən,
Durub gəzmə, yer üzündə yoxam mən.
Aç sinəni, sinən üstə dağam mən,
Ört qapını-sinən üstə gəz məni.
Çıxıb getdin,ürəyimdə,
Oxun yaddan çıxıb qalıb.
Yığıb apardın azını-
Çoxun yaddan çıxıb qalıb.
Dağı yığılıb dağ olan,
Həsrəti mənnən doğulan.
Yastığın üstə dağılan,
Qoxun yaddan çıxıb qalıb.
Yolların belinə yük olduq demə,
Görüşdük arada əridi yollar.
Özümüz gəlmədik görüş yerinə,
Bizi bu görüşə sürüdü yollar.
Bizi yandıranda baxışlarımız,
Müqəddəs atəşə döndü məhəbbət
O gün ki,əlinə əlim toxundu,
Söndü müqəddəslik,söndü məhəbbət.