Day bir də yazılmaz dəftər başı daşlı,
Ölsün qoy acından Səftər başı daşlı.
Həm Heydərə yazdım, həm Qəmbərə yazdım,
Heydər kimi susmur Qəmbər başı daşlı.
Deputat Kərim axır şişdi, yoğun oldu,
Boynun necə kəssin xəncər başı daşlı?!
Salmış məni, ey əhli-müsəlman, ələ dirsək,
Artıq yaradıb yoxsa ki, Allah ələ, dirsək?!
Gördüm bir evim var yuxuda xaneyi-abad,
Şükr eylədim Allaha o dəm mən evi bərbad.
Opbandım elə daxil olam mülkümə, heyhad,
Çıxdı otağın pəncərəsindən çölə dirsək.
Dərdimiz, Mirzə, bizim, eyniləşibdir deyəsən,
Dərdi-qəm məndə budu, fikri-məlal səndə budu.
Gizləyib neyləyəsən, gizləməyib neyləyəsən,
Gizləyirsən də budu, gizləməyirsən də budu.
Dəyir hey başımıza, vermədən heç arə,qapaz,
Ki, edə biz kimi biçarələrə çarə qapaz.
Bakıda Rozalar iş tapdı, Xəlillər qaldı,
Metro ağzında neçə cannı zəlillər qaldı.
Qarabağ getdisə, fikr etmə əlillər qaldı,
Qolu yoxdur, qıçı yox vur belə bimarə qapaz.
Döndü zamanın üzü-qarğa dağ üstündədir,
Qonduğu yer qartalın tir budaq üstündədir.
Gülşənə bayquş gəlir gül qoparır yarpağın,
Bülbülü viranədə, fikri bağ üstündədir.
Boş baş yenə cədvəldə adın başlığa saldı,
Boş baş elə başdan özünü boşluğa saldı.
Xalq da başı daşlı belə məcburi gedişnən,
Nikbin gələcək yollarını daşlığa saldı.
Sallanmağa xol tapdıq,
Əldən ki, budaq getdi.
Gizlənməyə kol tapdıq,
Ev getdi, ocaq getdi.
Hökm altda büzüşdük biz,
Əldən-ələ düşdük biz.
Hər yolda sürüşdük biz,
Qıç getdi, balaq getdi.
Rahat ürəkdən olmusan-sağlam ürəkdən olmuşam,
Sən də çörəkdən olmusan, mən də çörəkdən olmuşam.
Gündə mənim günümdəsən-gündə sənin günündəyəm,
Sən də mənim günümdəsən, mən də sənin günündəyəm.
Bizim elin öz alveri,
Ən ucuzu söz alveri…
Məmurluqdu qız alveri,
Narkotika rəislikdi…
Sənə alverdən dərs desin;
Yaralı müdir dəstəsi…
Hamısı rüşvət xəstəsi,
Bu da bir növ mərizlikdi…
Gördüm, ay qonşu, gecə dövranı taraz yuxuda,
Xeyir olsun, desən, inşalla şər olmaz yuxuda.
Görürəm ki, yuxuda qaz verilir pay, qonşu!
Hətta neftdən verilir pay bizə hər ay, qonşu!
Kridit borclarını bağladılar, ay qonşu!
Pulu cağ-cağ kişimə eyləyirəm naz yuxuda.