Yaşadıqca itin ömrün,
Sümürüldü tütün ömrüm.
Banklarında bütün ömrüm,
Kriditə çıxdı,vətən!

“Igidlərin” yeyib baldan,
Uzaq gəzdi qalma-qaldan.
Məmurların sənə daldan,
Pis göz ilə baxdı, vətən!

Gecə-gündüz yedik şoru,
Gözümüzə çəkdi toru.
Sərvətinsə,boru-boru,
Yad ellərə axdı, vətən!

Kasıb ümmətin kor baxtı,
“Beytül-mala” da kor baxdı.
Mollası haqqa xor baxdı,
Ürəyimi sıxdı vətən…

Solun getdi, sağın getdi,
Neçə-neçə dağın getdi.
Getdi, Qarabağın getdi..!
Dağın, bağın “çoxdu”,vətən!..

Iqbalın yoxdur, dedilər,
Falçıya baxdır, dedilər.
Bu da bir baxtır, dedilər,
Görüm belə baxtı…Vətən!..