Köhnə doşab sirkə çıxıbdır deyən,
Sirkəni bal eyləyənin lap belə…
Kal yedirib xalqına dəymiş kimi,
Dəymişi kal eyləyənin lap belə…
Ermənidən torpağı al,ver bizə,
Yoxsa bu iş görsənir alver bizə…
Fars nə gəzir neftdə-sual ver biz,
Bir də sual eyləyənin lap belə.
Mənim bu sevgidən getməyim gəlir,
Göndər gətirdiyin baxışla məni.
Qayıtsam bilirəm bağışlayarsan,
Əyər qayıtmasam bağışla məni.
Yuxusuz ürəyim sənə yatmadı,
Dar gəldi bu geniş qəlbim də sənə.
Qəlbimi səninçün boşaltdım,amma,
Yer tapa bilmədim qəlbimdə sənə.
Bir qanadlı quş olmağa,
Xəyallara qoşulmağa;
Biraz könlü xoş olmağa,
Nə saz istə,nə çal-çağır.
Sənə nəğmə gərək olsa,
Məni çağır.
Təsəllinə dönnəm hər dəm,
Hər dərdinə dözən dərdəm.
Ürəyimə girən hər qəm,
Gözlərimdən sığal çıxır.
Sənə qayğı gərək olsa,
Məni çağır.
Nə qədər ki,bu elin milləti tərpənməyəcək,
Başı üstən o yana zilləti tərpənməyəcək.
Tək tıxıb,verməyən ac xalqa o məmur kələnin,
Söyəcəksən belə lap qeyrəti tərpənməyəcək.
Hər gün sevgi gəlir sevgimin üstə,
Tənhalıq hər gecə vurulur mənə.
Gecələr ölürəm öz qucağımda,
Gündüzlər mağarlar qurulur mənə.
Gündüz hüznümdə qarışır başım,
Gecə boğuluram tənhalığımda.
Tənhalıq əlindən hər gün ölürəm,
Hər gün doğuluram tənhalığımda.
Çəkərəm dilim altından,
Açaram-tökərəm sözü.
İlmə-ilmə toxuyaram,
Milbəmil sökərəm sözü.
Nə tullamaram “yal”ona,
Nə çövürmərəm dal ona.
Amma düşmərəm dalına,
Dalımca çəkərəm sözü.
